Nr. 15 GONNER, Nicolas (Hrsg.): 'Prairieblummen'

1883 publizéiert den Zeitungsredakteur Nicolas Gonner zu Dubuque am US-amerikanesche Staat Iowa e Band mat 62 Gedichter op Lëtzebuergesch. Dräi Dichter stellen heiran hiert Wierk fir: den Téitenger Jean-Baptiste Nau, dee kuerz Zäit zu Detroit gelieft huet a du rëm zréck op Lëtzebuerg komm ass, den Nicolas Edouard Becker, dee fréi mat séngen Elteren a Wisconsin ausgewandert ass, an do als Farmer, Schoulmeeschter a Politiker gelieft huet, an den Nicolas Gonner selwer, deen sech virun allem mat séngem Standardwierk Die Luxemburger in der Neuen Welt en Numm gemaach huet.

D'Prairieblummen sinn, sou steet et am éischte Gedicht, e Geschenk un d'Frënn an der aler Heemecht. D'Gedichter beschreiwen den Alldag vun de Lëtzebuerger Siedler am Mëttlere Weste vun der USA, vum Bëschrueden aus de Pionéierdeeg bis zur Oktavprozessioun an Ohio, a si erziele Soën a Legenden, iwwert de Jang de Blannen esou gudd wéi iwwert den Indianerchief Schwaarze Bier.

Grad wéi am Original ass an dëser Neiausgab vun de Prairieblummen och en detailléierte Glossar vum Nicolas Gonner. E 50-säitege Kommentar vum Sandra Schmit gëtt zousätzlech Informatiounen iwwert d'Liewe vun den dräi Dichter, verweist op ënnerschiddlech literaresch a kulturell Aflëss am Wierk, a bidd en Iwwerbléck iwwert eenzel europäesch Auswanderungsliteraturen am 19. Jorhonnert.

De Band ass illustréiert an huet 292 Säiten.

Gonner, Nicolas (Hrsg.): Prairieblummen. eng sammlonk fu lidder a gedichter an onserer létzebûrgerdeitscher sprôch. Virgestallt a kommentéiert vum Sandra Schmit. Mersch: Centre national de littérature, 2008. ISBN 978-2-919903-10-8.

Präiss: 14 €